ភ្នំពេញ៖ ភ្ញៀវទេសចរប្រចាំសប្តាហ៍គិតចាប់ពីថ្ងៃទី៣-៩ ខែកក្កដា ឆ្នាំ២០២៣ មានប្រមាណ ៣០ម៉ឺននាក់ ខណៈគោលដៅទេសចរណ៍សំខាន់ៗមាន ៦រាជធានី-ខេត្ត។
តាមរបាយការណ៍ពីមន្ទីរទេសចរណ៍រាជធានី ខេត្ត បានឲ្យដឹងថា ស្ថានភាពភ្ញៀវទេសចរប្រចាំសប្តាហ៍ ដែលបានទៅទស្សនាកម្សាន្តតាមតំបន់ និងរមណីយដ្ឋានទេសចរណ៍នានានៅទូទាំងប្រទេស មានភ្ញៀវសរុបមានចំនួន ២៨៦ ៩៥៩នាក់ ក្នុងនោះភ្ញៀវជាតិ ២៥០ ៨៨៧នាក់ និងភ្ញៀវអន្តរជាតិ ៣៦ ០៧២នាក់។
ជាមួយគ្នានេះ គោលដៅទេសចរណ៍សំខាន់ៗ រួមមាន ខេត្តបាត់ដំបង ខេត្តកំពត រាជធានីភ្នំពេញ ខេត្តសៀមរាប និង ខេត្តកណ្តាល ខណៈខេត្តព្រះសីហនុមានទេសចរទៅកម្សាន្តច្រើនចាងគេរហូតដល់ ៦១ ៣៨០នាក់។
ក្រសួងទេសចរណ៍បានកត់សំគាល់ថា ចំនួនភ្ញៀវទេសចរខាងលើ មានការថមថយប្រមាណ ៦,៣៨% ធៀបនឹងសប្តាហ៍កន្លងមក ក្នុងនោះភ្ញៀវជាតិ ថយចុះប្រមាណ ៨,១១% ខណៈដែលភ្ញៀវអន្តរជាតិ កើនឡើង ៧,៧៧%។ ការថមថយនៃចំនួនភ្ញៀវក្នុងស្រុក គឺអាចមកពីមន្រ្តីរាជការ និងប្រជាពលរដ្ឋដែលជាថ្នាក់ដឹកនាំ និងសមាជិកគណបក្សប្រជាជនកម្ពុជាដ៏ច្រើនលើសលុប ជាប់រវល់ក្នុងយុទ្ធនាការឃោសនាបោះឆ្នោត៕
